Guillem de Masdovelles
1 Le temps presens de guaya primavera
2 m’ensen tan fort, que fin’amor decori
3 mils que no sull, cosirant l’ajutori
4 de leys qui·s tayn que·m digu’: «Amichs, arrera»,
5 per gran rayzo, car es de pretz tan auta,
6 ez yeu li suy tan sotsmes he tan baix,
7 que ssi guay temps ez amoros pentaix
8 socors no·m fan, suy caygutz en deffauta.
9 Mas le prims darts amoros ffer he sauta
10 lay hon li platz, no guerdant ges dretxura;
11 so·s maniffest per veray’escriptura,
12 que d’aut a baix mantes de vetz resauta,
13 ez a mig trayt, aysi co·s vol, se vira,
14 anant firent per treves he per lonch,
15 en mortals colps; no dona ges un jonch
16 leys qui·l tremet, ans ab argull ho mira.
17 Per qu’ieu sper que, de me pertint, ffira
18 le darts mi-doncs, fazen colp desreunable,
19 amb playa tal, que no sia curable
20 ffins que mos prechs tot homilmen soffira;
21 e lladonchs tuyg poran dir: «Ben derocha
22 Amors los uns e·ls altres monta sus,
23 que veus aquest, dessenperat he jus,
24 tan alt montats, que·ls sobirans lochs tocha».
25 Sest pensamens denan tots altres flocha,
26 per que·n fau laus a la sayzos qui·l porta.
27 Pero dich mal; he, si cazia morta
28 leys c’am, del colp, seria tala pocha?
29 No, mas ten gran, per que·m pinet susara,
30 e vull trop mils quez yeu, lenguin, trespas,
31 que si, per mi, don’ab aytal compas
32 prenia mal d’ayçell c’Amor despara.
33 Per qu’ieu soffir, e sofferay encara,
34 lo dan que prench, si tot vey que me·n cruscha,
35 e serviray lo mils que servir puscha,
36 selan, soffren, pus ella m’es tan cara;
37 e no·s pot ffar que sa gran gentilesa,
38 qui resplendeix axi com fa·l solells,
39 quant aura vists mos redobblats flegells,
40 no·m prest la ma de piatats estesa.
41 Li dur sospir e·l grieu pensar, contesa
42 mouo trop fort, amb darts ez amb cayrells,
43 jins en mon cor, mas er le temps novells
44 m’a de fin joy sperança promesa.
Ed. Ramon Aramon i Serra, Cançoner dels Masdovelles, Barcelona, I.E.C., 1938, p. 67.
Cfr. 103.90.
Incipitario
di Guillem de Masdovelles
Indice
degli autori
