Gilabert de Próixita
1 Fort me desplay cant no vey
2 lieys de qui suy franch serven;
3 car si u fets, enaysi gen
4 no mauciuron li desire,
5 on er mantes vets sospire,
6 que·m preson cant mi sove
7 que naysi·m cove languire
8 per lieys, on no trop merce.
9 E quant vas autre no crey,
10 ne y puesch haver mon talen,
11 si·l plagues ab fas jausen
12 me degre per sieu retenire.
13 Cert, duymay no say que dire:
14 cant plus fort samor me te,
15 semblant fa [la] vuelh trasire,
16 tan fort me lonya de se.
17 De çay on suy la suppley
18 que no·s mostre malvolen
19 vas me, qui·l suy leyalmen
20 hom fis e franch per soffrire;
21 que, si·s vol, me pot aucire.
22 Mas ges della no·m partre,
23 ans si·l vulh de cor servire
24 ses que may no·m faça be.
25 Saubets per que li mautrey
26 enaysi deliuramen?
27 Car en bos faytz es valen,
28 plus quautre que·l mon se mire.
29 Sa beutat, blanxa com lire,
30 pus belha que nulha re,
31 ffay vers luy mon cors asire,
32 don suy seus plus que de me.
33 Mil vetz muyr lo jorn denu[e]y
34 cant no li suy lay presen,
35 e say que morray breumen
36 si no la vey dels huelhs rire.
37 Car si no fos cant la vire,
38 figurans la dins me fe,
39 ja magre mort li cossire
40 que per lieys tot jorn me ve.
41 Dompna ses par, be puix dire
42 que vos me faytz mal e be:
43 mal, cant ne muyr de desire,
44 be, quant vos am mays que me.
Ed. Martí de Riquer: Gilabert de Próixita, Poesies, Barcelona, Barcino («ENC»), 1954.
Incipitario di Gilabert de Próixita
Indice degli autori