Rialc
Rao 0.19
Poesie anonime
1 Aujhat, baros, que passat per la via,
2 si es dolor tan gran com es la mia,
3 del mieu car filh, mon conort e ma vida,
4 que·y vey morir a mort tan descausida.
5 Mort, car no·m prens? Volenteyra moria!
6 Ay bels filhs cars,
7 cum m’es lo jorn doloros e amars!
8 Huy bel mayti m’apellav’om Maria;
9 ar m’es camjats lo mieus noms en marida,
10 car mariment auray, may cascun dia,
11 del mieu filh car, que Dieus donat m’avia;
12 la un lo bat, e l’autre vey que·l lia.
13 Ay bels filhs cars,
14 cum m’es lo jorn doloros e amars!
15 Tots temps seray dolenta, esmarida,
16 car aquel gaug, que eu aver solia,
17 tot m’es tornat en sospir e en ira;
18 gran dolor n’ay, mayor m’en tanheria.
19 Regarda·m fyl, que·l cor meu partoria.
20 Ay bels filhs cars,
21 cum m’es lo jorn doloros e amars!
22 Molt me pesa lo greu mal que·l vey trayre.
23 Ay que·s fara la sua lassa mayre,
24 car vey morir cel que es filh e payre!
25 De tot lo mon es apellat salvayre.
26 Lo cor mi part, car no m’en pusc estrayre.
27 Ay bels filhs cars,
28 cum m’es lo jorn doloros e amars!
Ed. Barbara Spaggiari, «La ‘poesia religiosa anonima’ catalana o occitana», Annali della Scuola Normale Superiore di Pisa, III s., 7, 1977, pp. 117-350, a p. 142.
Nucleo originario del componimento (strofi II, III, IV, V dell’ed.). Strofi aggiunte in 0.19a e 0.19b (item unico in Rao: 0.19).