Andreu Febrer
1 Del cor preyon me parton li sospir
2 que porton lay mey hulh trist, remiran
3 al douç repaus on stay sagornan
4 la plus gencers que·l mon se cord ne·s mir,
5 cuy valors fay sus les autres gresir
6 tan, c’om [no] pot ses beutats pro lausar,
7 car Dieu la volch eslegir e triar
8 tal on no crey [que] pogues mays assire.
9 Que anch puys en crotz volch sos brats spandir,
10 Dieus no·n formech tan belh’, al meu semblan:
11 bel cors e dreyt, blanx e lis, ben stan,
12 gay, humiliu, scusat de falhir,
13 a cuy no cal pausar nez affegir,
14 qu’en ses fayçons no·s pot res milhorar.
15 Benaj’Amors, qui la·m fay tant amar,
16 que ’n altre part no·m torç, ne·m vol, ne·m vire.
17 Car pus m’avench de vos, bella, partir
18 ultra mon grat, ja plus guerra no·m dan
19 mey huelh ne·l cor, mas tornar [me] poran
20 lay on vos etz, per plus yvars morir;
21 car be·m val mort, si us vey e no us gos dir,
22 ne far perven ab semblan ne·s sguard,
23 l’amor que us hay, ne m’i aus venturar,
24 mas plorar cuig dels hulhs quan vos remir[e].
25 E sol q’un pauch vos plagues sofferir,
26 ja plus no vuelh que·m detz bossa ne gan,
27 ne guesardos autre ges no us deman,
28 mas que us posques ab vostra grat servir;
29 qu’yeu suy plus richs, dona, d’aço que us quir
30 no fon Jason del velhor conquistar
31 quan los perilhs del drach fer poch sobrar,
32 e may dels bous qui·l cuydaren aucire.
33 Donques, si us plats, no·m fessatz pus languir,
34 qu’ieu no suy mort ne me·n vau molt tardan,
35 que·l gran desir e l’auney m’aulciuran
36 s’ab vos no puix merce breu conseguir;
37 car tant no·m luny qu’eu vos puxa fugir,
38 axi co·l cerffs com se pot may tudar
39 ffuig, e quant ve que no pot scapar,
40 torn’a las mans dels cassadors morire.
41 A vos me ren, qu’alhors no puix gandir,
42 Angel, pus vey ma mort apropiar;
43 vos ma valets, qui·m podets restaurar,
44 car altramen ja suy prop de finire.
Ed. Martí de Riquer: Andreu Febrer, Poesies, Barcelona, Barcino («ENC»), 1951.
Incipitario di
Andreu Febrer
Indice degli autori
