Joan de Castellnou
1 Dieus! E com soy alegres e joyos,
2 car leys qu’eu am mais que re qu’el mon sia
3 m’a recebut de sa gran cortezia
4 per servidor ab son xan glorios;
5 diatz, amors, quo la poray servir
6 segon dover ni retrayre sos laus?
7 Essenyats m’o, car neys pessar no m’aus
8 que la sopley, tan fay sos pretz florir.
9 Ay! gentils cors azautz e gracios,
10 guays e plazens e de be la paria,
11 humils e clis vos ren la nuyt e·l dia
12 grat e merce, co·s tayn, da genyolos,
13 car vos platz mi de cruzel mort gandir
14 e de trebayl pausar en gran repaus;
15 per que dir pusch que vos etz ferma naus
16 que m’a gandit en la mar de perir.
17 Quant eu recort vostras belas faysos,
18 e com merces vas me vos homilia,
19 tant ay de gaug, ma bela dolç’aymia,
20 que totz pesars autres m’es enujos;
21 car etz us rams qu’a totz vos faitz grazir
22 clars, netz e purs en la cim, en la caus,
23 am bell escuyll e am resplanden aus
24 que dins mon cor esta ses departir.
25 Ay! franca res, vostre pretz cabalos,
26 vostra beutat ses nuyla maestria
27 mesclad’am sen, ab joy e am cuyndia,
28 am pietat e am ditgs precios,
29 humils e cars e plazens per auzir,
30 e vostr’esgartz amoros e suaus
31 me fay estar de vostr’amor tan claus
32 que neys pesar no m’aus qu’ieu vos remir.
33 Flors de joven, que·m faray yeu per vos?
34 aylas, no y pusch trovar sendier ni via;
35 que no us envey estar no m’en poyria;
36 que·m desesper non es dretgs ni razos;
37 e com me fay amors per vos languir,
38 qu’eu soy amatz coralmen ses nuyls fraus,
39 e vos tinetz de mon fin cor las claus,
40 am tot aisso me vey tot jorn delir.
41 Per tot lo mon iray, mon Fin Dezir,
42 si be m’ai trops enemichs fers e braus,
43 vilas cerchan, borchs e lochs nautz e caus
44 per vostre pretz solamen espandir.
Ed. Jaume Massó i Torrents, «Poésies en partie inédites de Johan de Castellnou et de Raimon de Cornet d’après le manuscrit de Barcelone», Annales du Midi, 24, 1914, pp. 449-457, a p. 468.
Incipitario
di Joan de Castellnou
Indice
degli autori
