Rialc
Rao 34.2
Joan de Castellnou
1 Axi·m te dins el gran briu
2 d’amors pessiu
3 la bela res qu’eu dezir
4 xantan servir,
5 que no say vas hon me vir.
6 Artz ni sabers no deviza
7 en qual guiza.
8 mori languen per s’amor,
9 car ela ges no·m desfiza,
10 ans m’acisa
11 vas se, guardan sa valor,
12 per que·m platz mays el gran riu.
13 De son pretz viu,
14 esperan rich joi, morir
15 qu’estiers gandir
16 lo pung del darier sospir.
17 Critz d’enemichis no·m desguisa
18 ans m’aviza
19 qu’ieu deg ja far per s’onor.
20 Dança de noella siza,
21 car l’asiza
22 de fin pretz e de ricor
23 te su·l grau superlatiu
24 ab cor presiu
25 pels fols aymans gremir,
26 de grieu martir
27 e pels fizels avantir.
28 Mant hom, de liey profetisa:
29 que sa visa
30 ne pren nova resplandor,
31 e ditz ver, car gent assisa
32 blanx’e lisa
33 la vey e de bos aybs flor
34 axi d’ivern com d’estiu,
35 don soz pretz viu
36 ben olens com flor de lir,
37 per qu’ieu m’azir,
38 las! can no la puesc servir.
39 Mon Fin Dezir, hon reviu,
40 de pretz altiu
41 le flums per ben far e dir,
42 prec que suplir,
43 vuyla ma dans’e grasir.
Ed. Jaume Massó i Torrents, «Poésies en partie inédites de Johan de Castellnou et de Raimon de Cornet daprès le manuscrit de Barcelone», Annales du Midi, 24, 1914, pp. 449-457, a p. 454.