Pistoleta






    1      Ar agues eu mil marcs de fin argen
    2      et atrestan de bon aur e de ros,
    3      et agues pro civada e formen,
    4      bos e vacas e fedas e moutos,
    5      e cascun jorn .c. liuras per despendre,
    6      e fort chastel en que·m pogues defendre,
    7      tal que nuls hom no m’en pogues forsar,
    8      et agues port d’aiga dousa e de mar.

    9      Et eu agues atrestan de bon sen
    10     et de mesura com ac Salamos,
    11     e no·m pogues far ni dir faillimen,
    12     e·m trobes hom leial totas sasos,
    13     larc e meten, prometen ab atendre,
    14     gent acesmat d’esmendar e de rendre,
    15     et que de mi no·s poguesson blasmar
    16     e ma colpa cavallier ni joglar.

    17     Et eu agues bella domna plazen,
    18     coinda e gaia ab avinens faissos,
    19     e cascun jorn .c. cavallier valen
    20     que·m seguisson on qu’eu anes ni fos
    21     ben arnescat, si com eu sai entendre;
    22     e trobes hom a comprar et a vendre,
    23     e grans avers no me pogues sobrar
    24     ni res faillir qu’om saubes atriar.

    25     Car enueis es qui tot an vai queren
    26     menutz percatz, paubres ni vergoinos,
    27     perqu’eu volgra estar suau e gen
    28     dinz mon ostal et acuillir los pros
    29     et albergar cui que volgues deissendre,
    30     e volgra lor donar senes car vendre.
    31     Aissi fera eu, si pogues, mon afar,
    32     e car non pois no m’en deu hom blasmar.

    33     Domna, mon cor e mon castel vos ren
    34     e tot quant ai, car etz bella e pros;
    35     e s’agues mais de que·us fezes presen,
    36     de tot lo mon o fera, si mieus fos,
    37     qu’en totas cortz pois gabar ses contendre
    38     qu’il genser etz en qu’eu pogues entendre.
    39     Aissi·us fes Dieus avinent e ses par
    40     que res no·us faill que·us deia ben estar.

P.-C. 372.3. Ed. Erich Niestroy, Der Trobador Pistoleta, Halle, Beihefte zur Zeitschrift für Romanische Philologie, 1914, p. 60.