Rialc
Rao 83.4
Lluís Icart
1 Eras quant vey dels brots tombar la flor,
2 la flor pel frug, que naix ab manta fulha,
3 ffulha del ram, e pels camps lerba brulha,
4 brulha ’nyssi, don nays dins en mon cor
5 us fis volers qui tots vicis ne bota
6 e·m fay star gay e damoros gest,
7 e·m tol affans, e tot joy me revest
8 dengeny e dart ab conaxença tota.
9 Tota beutat met dins en lo meu test,
10 test plen damor quen autra re no pensa;
11 pença coral tench per luy ses deffença;
12 deffença pas no vulh, pus ma conquest
13 per fin aman de la valen que·s troba
14 lay dorien fins en lo solelh post,
15 que res non falh al sieu cors ben compost,
16 car ses affayt es belha b tota roba.
17 Roba donor me·n vest ab son acost;
18 acost de liey totaut[r]a creix de fama;
19 ffama pel mon cespan que tuyt enflama;
20 enflama tost son renom de gran cost.
21 Car de tots ayps te joyos cossistoris;
22 reyna de prets li dison per tot loch
23 li gran e·l pauch, enqueras li badoch;
24 tan los encen damor qui·ls es notoris.
25 Notoris mes que, daquelh temps dAnoch,
26 Enochs le velhs, no[·s] viu plus gentil cara;
27 cara de preu qui·ls trists de gaug empara;
28 empare·ls ferm ab laç damoros foch;
29 si que no·l say en sa nobla persona,
30 neta com laur, lunha re qui li manch,
31 mas quinmortal fos son cors de tal sanch
32 e que del mon portas ceptra y corona.
33 Corona port de ceura men laut banch;
34 banch sobre tots los amadors del segle;
35 setgle rictats no preu tant com un regla;
36 recgla mos cors e dins amors lo tanch.
37 Quan pens quyeu am la flor del mon elesta,
38 mon cor e·ls senys crexon en pompa gran,
39 car Dieus la fech apres de sant Johan
40 la plus saubens que·s despulh ne que·s vesta.
41 Castelhs donor, de vos feran tuyt gesta,
42 libres de laus li gay e·l fin ayman,
43 car chascus ditz quama la mays presan
44 e vos etz caps: donchs per vos fan la festa.
Ed. Joaquim Molas, «Lobra lirica de Lluís Icart», Estudis Romànics, 10, 1962, pp. 227-254.