Rialc
Rao 34.6
Joan de Castellnou
1 Si co·l soleyls, per son cors acomplir,
2 cada petit se comens’a luynar
3 de nos, axi li arbre desmayar
4 fuylas e frutgs e sas beutatz jequir
5 e fan del tot semblansa de morir
6 e l’auzelo perdo xant e baudor,
7 si cum aiçel qui son luyn, ses mentir,
8 de tot plazer e pres de sa dolor.
9 Dona, vos etz le soleyls tan luzens
10 de quez ieu soy departitz e loinhatz,
11 per que de joy remanch tot despylatz,
12 qu’en me non es mas dols e marrimens
13 tals que jamays no pusc esser guirens,
14 sai per la gran vertut de vostres rays:
15 guaray ne doncs? tals es mos pessamens,
16 pus qu’ieu vos soy del tot fis e verays.
17 Ay, francha res, cortes’e benestans,
18 faitz que mos dretgs vengo leu a bon port,
19 si no sapiatz qu’ieu en pendray la mort
20 injustamens, e planch o mais dos tans
21 per malestar vostre que per mos dans;
22 soveyna us doncs lo jorn tan doloros
23 qu’ieu no vi plus vostres huyls agradans
24 que·m promezes, can pris comjat de vos.
25 Dona, prech vos, si Deus vos gart de mal,
26 que no·m gitetz del tot a non xaler,
27 si no de mort me covendra xaser,
28 e auretz ne greu peccat criminal;
29 e si avetz pietat tal o qual
30 de mi, caitiu, c’ai per vos tan mal tratg,
31 auretz ne grat del rey celestial.
32 Amor, merce! no i dich re per retratg.
33 Mas yeu vos vey tan fer’e tan cruzel
34 encontra mi que mos sens n’es perdutz;
35 no ses razo, car de naut soy casutz
36 e m’aucizets si cum alcis Jael
37 Sizara·l duch e·l fols Cahim Abel,
38 e am vos may que Thobias no fe
39 a la gentil fylla de Raguel:
40 no·n diray plus, car be say que·m rete.
41 Mon Fin Dezir, si us ajut Dieus del cel,
42 no m’auciatz, que no us ay fatg per que,
43 ans vos am mays que Jacob a Ratxel:
44 e prezi me·n, car fau ço que·s parte.
Ed. Jaume Massó i Torrents, «Poésies en partie inédites de Johan de Castellnou et de Raimon de Cornet daprès le manuscrit de Barcelone», Annales du Midi, 24, 1914, pp. 449-457, a p. 459.