Rialc
Rao 34.5
Joan de Castellnou
1 Qui de complir tot son plazer assaya,
2 no cossiran ço que·l plazers l’adutz,
3 delix e frayn las principals vertutz
4 don le plazers vertadiers creys e raya;
5 d’aytals plazers falens e desleyals
6 resort e nays us crims descominals,
7 que razo, dregt e conoxença pura
8 sotzmet, per que le fatz volers s’atura
9 lay don receb le plazers avantatge.
10 De caschu fayt s’atayn que·l fenir aia
11 senblan per que cel que y es decebutz
12 non es comtaz entre·ls apercebutz,
13 tot no sab certamen quo s’eschaya
14 mieyls en la fi, car prezumir sevals
15 deu hom que cert la fis sira leyals,
16 si·l començars adutz es per mesura;
17 començamens desmezuratz pauch dura;
18 començar deu plazer donch ses folatge.
19 Ans que·l volers al plazer fort s’atraya,
20 qui del plazer vol dretg venir a lutz,
21 deu cossirar si·l plazers es degutz
22 e que razos del voler no s’estraya,
23 car del voler es razos naturals
24 sosteyns e pretz e gasayns e cabals
25 no defalens, car tot jorn li procura
26 sen e saber per fogir la ventura
27 del mon e puys de l’infernal estatge.
28 Plazers qui fayll quant es mays obs que playa
29 desplazers es, quant es reconegutz;
30 e desplazers don ve plazers legutz
31 sobra totz bes, car nuyl temps no s’esmaya
32 quant deu plazer, ans dobla sos jornals
33 e fay jauzir de bes perpetuals
34 on le plazers defalens se pejura;
35 de plazer donchs que·s pert e no·s meylura
36 deu hom fugir e laixar son usatge.
37 Humilitatz e sofrença veraya,
38 per los quals es totz volers entendutz.
39 Es al dejos, mas es coltz e volgutz
40 e deziratz us dons que tol la paya
41 del gay plazer e convertex en als
42 ab argumentz sofisticatz e fals
43 e palliatz ço don razos mays cura,
44 lo veray nom de razo desfigura
45 tant que no·l fay nuyl volers homanatge.
46 Mon Fin Dezir paradis er dels mals,
47 e dels perfeytz le turmens infernals,
48 e Dieus sira contraris a dretxura,
49 can le volers don razos se rancura
50 portara flor ni fruit ses gran dapnatge.
51 Si Mos vers es fargatz de motz leyals
52 reys d’Arago, seynor mieus, vos etz tals
53 que l’entendretz ses glos’e ses lectura
54 e tu Ramaç, car te ve per natura,
55 fay li·n prezen a ley de bon missatge.
Ed. Jaume Massó i Torrents, «Poésies en partie inédites de Johan de Castellnou et de Raimon de Cornet daprès le manuscrit de Barcelone», Annales du Midi, 24, 1914, pp. 449-457, a p. 469.