Joan de Castellnou
1 Valor ses frau, dona, tenetz en car;
2 beutat servan no faytz descausimen;
3 barat fugetz, no dan respos cosen,
4 lauzor ses brutg vos play leu gazaynar;
5 saber voletz be ses mal angoxos;
6 secretz valens, no croys, tenetz desotz
7 siguetz d’amor, cert, no d’engan, la votz;
8 plazer ses dan ay eu xantan per vos.
9 Dever, no tort, faitz vos, cors gracios;
10 tenetz me gay, no trist, jur vos per crotz;
11 coletz ap ley d’onor, bels, no laigs, motz;
12 esper veray, no fals, donatz als bos;
13 Amor ses fol dezir faitz aut montar;
14 dat m’avetz gaug e no sol marrimen;
15 guazaynat ay plazer ses languimen;
16 honor ses mal, bela, faitz conquistar.
17 Favor ses platg, dona, play vos mostrar;
18 vertat gardan, no ges erros dizen;
19 amat avetz, certas, preti, no vill sen;
20 baudor ses dol ap letg faitz exaussar;
21 conquerer faitz, dona, joys ses fols dos;
22 pretz ses erguyll mostratz, per cert, a totz;
23 ubretz de gautg, no ges de mal, la dotz,
24 poder ses greug donatz als amoros.
25 Ver, no malvat, cofort tractatz als pros;
26 mantenetz joy, no plor, doblan sanglotz;
27 discretz, no fols, cosseyls donatz a motz;
28 tener vos play fe ses cor envegos;
29 flor ses ram sech, dona, voletz portar;
30 grat, no despietg servatz, comunalmen;
31 pujat avetz joy ses latg chauzimen;
32 doussor, no planx, dona, faitz meylurar.
33 Sabor trobatz mostran be, no mal, far;
34 baylat m’avetz gautg ses defalimen;
35 estat ay bautz, no tristz, vos mantinen;
36 odor plazen, no vill, play vos donar;
37 vezer me faitz gaug ses planx doloros;
38 cuylletz d’amor lo frutg, no ges los brotz;
39 decretz, no toriz, posatz preon del potz;
40 parer me faitz, dona, just, no fraudos.
41 Lezer a trops datz vos sant, no dapnos;
42 trametetz çay ris, no plorans sanglotz;
43 pretz clar, no crim servatz espanden motz;
44 plazer, no mal, de vos ditz ma xanços.
Ed. Jaume Massó i Torrents, «Poésies en partie inédites de Johan de Castellnou et de Raimon de Cornet d’après le manuscrit de Barcelone», Annales du Midi, 24, 1914, pp. 449-457, a p. 465.
Incipitario
di Joan de Castellnou
Indice
degli autori
