Rialc
Rao 192.1, 192.1a, 192.1b, 192.1c, 192.1d, 192.1e,
192.1f, 192.1g, 192.1h
Francesc de la Via
1 A vos, qu’estz deessa d’amor
2 e la pus bela e milor
3 que jamay formes lo Salvayre
4 ten solamen ne trasch sa mayre
5 qui james hac deffalimen,
6 ans fon sus totas resplenden
7 de virginitat e santeza
8 perque lauzan vostra baleza
9 es en tal grau que no us trob par,
10 per dar vos favor, recitar
11 vul aycesta cobbla novela:
12 «Avant, avant, e veyretz la plus bela
13 qui·s pod trobar dins la mundenal tanca,
14 de gran bontatz soste la nauta branca;
15 e cerquatz pro, no·l trobaretz parela;
16 tant ha de sen, gays comportz e bon ayre.
17 Lauzar la vey a tota creatura,
18 que pus bel cors no produhic natura
19 despuys que Dieus eleguich la seu mayre».
20 Quar vos estz perla d’ayre
21 guarnide de virtutz,
22 no poden estar mutz
23 aycels qua vos han vista,
24 per sant Johan Baptista!
25 E van dizen tot dia
26 que vostra senyoria
27 es be digna de laus;
28 e no han nul repaus
29 d’espandir vostra fama,
30 qui relutz con a flama
31 per mantas partz del mon;
32 quar no·n sera, ne·n fon,
33 ne·s troba ’n veritat
34 gran temps ha sie stat
35 dona ’b ten gran destreza,
36 que may no fos repreza,
37 ne y trop defalimen;
38 que·l vostra scentimen
39 tota bontat dezira,
40 que ’n doctoral cadira
41 say que podetz ligir
42 e dones instruyr
43 sens alguna duptanssa.
44 «Com li seraff per gran benuyranssa
45 prendo clartat de l’acenssa divina
46 e son vermel, de color carmezina,
47 tot enayci per vostra hordonanssa,
48 Bela Venus, las donas e donzeles
49 d’aycest pays, auzin vostra doctrina,
50 en pauch de temps de virtutz las afina
51 si que la gen o te a maraveles».
52 No qual portar noveles
53 ne dir lo vostra nom,
54 quar sabiatz que tothom
55 o diu per totas partz.
56 May no seria fartz
57 de dir vostras lauzors,
58 si tot los envejos
59 me volen d’aysso mal.
60 No pas ells a cabal,
61 och encare las dones,
62 axi avols com bones,
63 e me n’han fayt enquesta
64 cruzel e manifesta
65 en poder d’En Copons,
66 qui·m te pres en grilons,
67 pauzant en obblidanssa
68 quand yeu li fi fermanssa
69 ab en Gem de Belloch.
70 Aycest terrible joch
71 ay eu sofert per vos;
72 mes totas mas dolors,
73 injuria, dampnatge,
74 soffrira d’aventatge,
75 si vostra senyoria
76 tot jorn veser poria,
77 que res tan no dear.
78 «Los mals ten greus qu’amors me fay sofrir,
79 m’agren ja mort si bon esper no fos
80 e·l contemplar vostra cors gracios,
81 Bela Venus, qu’eu am sens desmentir;
82 tant que, si·ls mals del mon fossen unitz
83 e totz ensemps me venguessen dessus,
84 no crey per lor posques estre comfus,
85 pus quez eu fos de vostr’amor guarnitz».
86 Que·l cors e l’esperitz
87 ensemps han fayta liga,
88 tan con lo mon estiga,
89 en dar vos laus e fama
90 quar vos la maraxetz,
91 e sabets e valets
92 sus tot’autra perssona,
93 d’on merexetz corona.
94 «Tres virtutz say dins la vostra persona,
95 Bela Venus, que no ha don’al mon
96 totas ensemps, axi com en vos son,
97 d’on merexetz sobra totas corona;
98 quar la bontat qui las dones afina
99 vey reluzir en vostra magestat,
100 que tothom diu que ’n la gran puritat
101 estz quax semblan a santa Caterina».
102 Honorabble cozina,
103 a vostra senyoria
104 intim com l’autre dia,
105 hun dicmenge mati,
106 pel fil d’En Geroni
107 resabi vostra letra,
108 la qual volgues tremetra
109 a me, vostra serven.
110 E tentost prestamen
111 aquela vau ligir,
112 de que tot mey dezir
113 ne foren cedolat,
114 vazen l’umilitat
115 de vos, senyora nobble,
116 qu’avetz de bon laus mobble,
117 haven compacio
118 de la gran pacio
119 quez eu sostinch per vos,
120 d’on visch mot doloros
121 ab mals innumerabbles.
122 Cestz mals es incurabbles
123 senes la vostr’ajuda,
124 car gran re ay perduda,
125 la forss’e·l centimen;
126 e jamay guarimen
127 no n’hauray a ma vida,
128 si donchs vos, qu’estz garnida
129 de bontat e balesa,
130 per vostra gentilesa
131 no·m mostratz vostra cara.
132 Jur vos per Deu lo para
133 e pel fil Jesucrist,
134 que no puch esser trist
135 lo jorn que vos ay vista.
136 Mes ara ’b veu mot trista
137 vau cantan nuyt e dia:
138 «De res no he carestia
139 sino de vezer m’aymia.
140 Jur vos [per] San Johan Babtista
141 be m’es cara vostra vista,
142 e, si morir ne sabia,
143 vezer vos iray tot dia.
144 Senyor dols e gracios,
145 major dezir n’ay que vos.
146 Sabiatz, si fer o podia,
147 ja de vos no·m partiria.
148 Vos, bela, us xufas de mi
149 la vespra de sant Marti,
150 que·m dixes una falcia:
151 que·l marit ab vos iria.
152 Senyor, no ych vulatz tornar
153 que·l marit me fets reptar,
154 qui·m diu ab gran felonia:
155 “Que ych fa ’N Francesch de la Via?”
156 A, Bela Venus ses par!
157 Nostra Senyor vul pregar
158 que mala febra l’aucia
159 qui de nos ha jelozia».
160 Donchs, gracios’aymia,
161 vostra gran senyoria
162 humilmen vul pregar
163 que·m vula loch donar
164 puxa perlar ab vos,
165 per esser pus joyos
166 remiran lo bel cos
167 galant ez adonos,
168 sens nul defalimen,
169 lo qual per tota gen
170 e per totz los estatz
171 say quez es reputatz
172 per lo pus bel del mon;
173 d’on manta dona fon
174 portan vos gran enveja,
175 quar lur pretz no·s pareja
176 ab vostra magestatz.
177 «Calen les lengues dels passatz
178 qui han volgut dones lauzar,
179 e quescus ditz en son cantar
180 de sidons grandes dignitatz,
181 dizens qu’es pus bela, milor;
182 mey ul los desmenton ploran,
183 quar si de vos no van xentan,
184 quescu d’els ditz trop gran error.
185 A totz aycels qui canten per amor
186 Venus, fai gratz perque us lauzen d’aytan,
187 quar xescus ditz quez ama la milor,
188 si ver es, totz van de vos xentan».
189 Resabi mes avan
190 trelat d’una tensso
191 d’una fort questio
192 qu’es entre dos amans.
193 La tensso es semblans
194 d’una quez eu na fi
195 al molt honrat cozi
196 e vostra fil mot car,
197 le qual se fay nompnar
198 Micer Bernat Belloch.
199 Senyor’ayço es foch
200 qui·s pren a totas partz;
201 volgra qu’ab agutz dartz
202 fos trencada la pels,
203 o ab punyents clavels,
204 d’aycels quan tal usanssa
205 ...
206 quar son pijor que layre,
207 e tothom es tritxaire,
208 ribaut e mot truan,
209 e dones per semblan,
210 volens n’amar mas d’u;
211 mas tant hic es comu
212 lo costum de la terra,
213 que viltatz nos afferra
214 a tuig generalmen.
215 Sabiatz qu’entigamen
216 vivien d’altre forma,
217 tinen regle e norma
218 de vertaders amans.
219 Morir volgra abans
220 lo gentil amador
221 que fes ten gran folor
222 que n’amas sino una.
223 Semblan feya quescuna
224 en lo bon temps redon,
225 car a la fi del mon
226 pens que siam vengutz.
227 Ara, si Deus m’ajut,
228 vey uzar del contrari,
229 que l’hom pech e falssari
230 n’amara dos o tres.
231 De las donas per res
232 no les escuzaria:
233 seguexen semblan via
234 amant ne sinch e sis.
235 Cest amar no es fis
236 ans es putanaria,
237 que ’N Francesch de la Via
238 ho dix perlan d’amor:
239 «Prou te dona d’un amador
240 que sia gays, franchs ez arditz
241 e de totz bos ayps jen garnitz,
242 qu’axi u manda la ley d’amor;
243 e si ela·n vol dos amar
244 merex qu’estia ’n loch pubblich
245 e quescus n’aja hun pacich,
246 pus vol l’estil d’amor trencar».
247 E segons que m’apar,
248 si com mon sen arresta,
249 la tenço es aquesta
250 que vostra senyoria
251 me trames l’altra dia:
252 «Mon bon amic, sabiatz que l’altre dia
253 auzi perlar una dona d’onor
254 si cruzelmen contra son amador
255 flastoman lo ab mot gran felonia
256 e maldizen, menan mortal ramor:
257 “Vejatz, si us play, amatz lo, lo traydor,
258 eu leyalmen ez el mi ab falcia”.
259 Quand l’en auzi cridar ab tal furor,
260 demande li: “Senyora del valor,
261 que us ha fayt cel per qui us donatz tal ira,
262 qu’ab tal rigor mudau vostra color?
263 Leg lo reptatz e lexatz sa paria”.
264 Cela respon: “Be es fort ma dolor
265 quand me recort que fes ten gran folor
266 de amar cel que·s troba d’altr’aymia.
267 A vos reclam, qu’etz deessa d’amor,
268 qu’ab vostr’ayman me partesca de lor
269 quar a mon grat jamay pus l’amaria”.
270 Joy dels amans, sus portatz la flor,
271 mos cars senyors, En Francesch de la Via,
272 d’aycest debat nos triatz lo milor;
273 gaug ses tristor per vos declarat sia».
274 Invoquans lo gran Deu
275 e·l glorios fil seu
276 e la Verge Maria,
277 per amor de m’aymia
278 en ayço do scentenssa,
279 la divinal essenssa
280 humilmen suppleyans,
281 e reclam totz los sans
282 que·m vulan endressar,
283 e mon front vul senyar
284 del senyal de la creu,
285 mirant ab li ull meu
286 los evangelis sans,
287 tocatz ab doas mans,
288 declar per esta via:
289 «Yeu Franceschs de la Via,
290 ciuteda de Gerona,
291 si tot no ha jes bona
292 ventura en amar,
293 mes hom no·l pot blasmar
294 quez anch n’ames mas una,
295 pus clara que la luna
296 ne·l sol en temps sere.
297 Vos la conexets be,
298 car no l’auzi nompnar
299 sino quand aug tronar
300 o quand fay gran tempesta.
301 No·m sembla jorn de festa
302 si no la vey parada,
303 gayamen arrezada,
304 quar es la plus gentil,
305 milor e plus humil
306 que nul hom vi jamay,
307 tant com esten son ray
308 lo solel ne la luna,
309 segons fama comuna,
310 jur vos per sant Ypolit.
311 Tornant a mon preposit,
312 retorn dar la scentenssa:
313 Quar la major falenssa
314 que podo far l’ayman
315 es quand se van mudan
316 per sercar altr’eymia,
317 car semblan vilania
318 ne fayt de tal despit
319 deu esser be ponit,
320 declar qu’esta senyora
321 en esta presen hora
322 deu acomiadar
323 l’amich qui per cassar
324 vay cerquan altr’eymia;
325 e que per nul temps sia
326 devan la seu presenssa
327 ne·l mostra bevolenssa
328 totz los jorns de sa vida,
329 ans ab pubblica crida
330 per totas encontrades
331 ne sian avizades
332 las dones e donzeles,
333 e qu’ab brogit d’esqueles
334 ez ab senys repicans
335 candeles amoztrans,
336 si com excomeniat,
337 isque d’aycest bisbat».
Ed. Arseni Pacheco: Francesc de la Via, Obres, Barcelona, Quaderns Crema, 1997, p. 295.