Rialc
Rao 188.1
Huguet del Vellat
1 En breu veyrem una freyor abatre
2 devas mig jorn, que mar fondra pels camps
3 la flor e·l frug, puys sera tan greus ffams
4 que dalgus bens costara·l diner quatre.
5 Apres la mort perseguira tant vida
6 que·ls pochs e·ls grans alciura vint a vint,
7 si que dels vius no restaran lo quint,
8 del solelh colch tro linfernal pertida.
9 Car us grius vey que sus lesgleya crida,
10 ffaren del bech al portal de la fe,
11 don poch a poch lo pilar qui·l soste
12 saflaquesex e chay devers lasida.
13 Per que lestor met la perdits a clusa
14 sus laltar vil, on sebeura del sanch
15 laygla gentil que sab visar el ranch,
16 on lonicorn pels aguilos pren musa.
17 Pero ne·l val doctrina dart confusa
18 si maniffest no y adutz per simbelh
19 lo cor e·l fron dun blanch laupart novelh,
20 noyrit de leyt o de carn dome crusa,
21 neta de crims, ses carnal payre, nada
22 en temps diverns e de guerres dubtos.
23 Ez autremen no nhaura dels ayglos
24 t[r]o si de joy la colompna dressada.
25 Mas dubtants suy, que·s trigua la jornada,
26 cossiran trop, car un drach molt cruzel
27 veig en orat volar sus vas lo cel,
28 que geta foch stant gola badada.
29 Lo qual foch crex e destrutz e derrocha
30 viles e burchs e castells e ciutats,
31 e trencha murs e portals e valhats,
32 e·l plus e·l mils del remanen que tocha.
33 Per ayco·s pert sobre·l fluvi la rocha
34 per on senclau la gran vapor del fum
35 el golf stern, don sperital lum
36 sostratz lauselh a la serpent badocha,
37 morent lesturç en la val tenebrosa,
38 surs larbre vert per qui fonch peradis
39 ubert ab gaug als devotz pelagris
40 quez eren filhs de virginal sposa.
41 Mos belhs saffirs, vos etz mars preciosa,
42 questa forest enclau e ncircumcis,
43 on crex lo past qui lolifan noyris,
44 qui deu portar als franchs vide joyosa.
Ed. Miriam Cabré, Rialc 2000.
Ms. Ha || 15 aygla] aygua. — 22 guerres] guerreres. — 24 foro sulla lettera ricostruita. — 30 burchs] bruchs. — 42 questa] quen ta.