Rialc
Rao 14.19
Fra Joan Basset
1 Una canço novelha vulh xantar,
2 arts divisin, observan melodia,
3 espandin laus de vos, senyora mia,
4 ses far legot, per que·m devetz aymar;
5 e si n mos ditz cometi nulha fauta,
6 perdonatz mo, yeu vos en clam merce,
7 Verges humils, pus dins lo cors me sauta
8 mos cor per vos, quyeu am de bona fe.
9 Virtuos flum, a vos doni mon clam:
10 clam just socors, dins vostra sala richa,
11 richa de joy, en la qual se publica
12 publica leys dejus mot fulhat ram.
13 Ram donestat, mostrats vostra franquesa,
14 franquesa tal que·m luny cruzel perilh;
15 perilh ne dan no·m fara pus malesa,
16 malesa grieu si vos mavets per filh.
17 Ardens volers martirisans me puny
18 e·m dona loch quyeu, las, meta me punya
19 a requerir vostra forma, qui·s lunya
20 orribles crims: per ço de vos no·m luny,
21 mayres subtils, ans ab plasen raquesta
22 requerin vau dun engeny mot request
23 la vostramor, pus beautats manifesta
24 sus vos fis pretz, qui us vey trop manifest.
25 Vergiers flayrans, dins vos noyris lo pom
26 amorosiu e plus dolç que no poma,
27 ab qui mon cor vostra valors me poma;
28 don yeu, per gaug de vostres lausors, pom.
29 Donchs, cors segrats, pus tenits jus la sola
30 mos gays desirs, e lauzens mays que·l sol,
31 valets ma tost, Na Perla, tota sola,
32 si no morray per vos amar tan sol.
33 Vostra belh cors Jhesus lo mesura
34 ab just compas de perfeyta masura,
35 per tant sabrets insignamen e pura
36 los vostres fayts, los quals Dieu apura
37 com vos formech, jen virtuosa planta,
38 y en vostra fas benignitat planta
39 e joya; donchs, si mos cor per vos canta,
40 no·m meravelh, pus David ne canta.
41 Belha ses frau, de pasor tot sespanta
42 le Sathans fals despuys que sespanta,
43 pel gran renom quen vos flori, infanta,
44 car a Dieu pur vostra cors infanta.
Ed. Pere Bohigas, Lírica trobadoresca del segle XV. Joan Basset i altres poetes inèdits del Cançoner Vega-Aguiló, Barcelona, Institut de Filologia Valenciana - P.A.M., 1988, p. 34. — Rev. Miriam Cabré.
Ms.: Hb. || 17 martirisans] martirits ans ms. e ed. — 19 forma] fama ed. — 22 requerin] requerén ed.