Tomàs Périz de Fozes
1 [T]rop me desplay can vey falir
2 senyor gran ni mermar s’onor,
3 e tot son pretz e sa valor
4 laxar per son voler seguir
5 e s’oblidar sen e sciensa
6 e ses razo moure gran tensa,
7 per gran erguyll, ab senyor natural:
8 be·l valgra mais no fos natz per son mal.
9 Tot aysi, segon mon albir,
10 li pren com al fol jugador
11 que non ha de perdre pahor
12 e, can ve puys al departir,
13 amena·l le jocs en perdensa,
14 car no vol aver abstinensa;
15 donchs cel qui sech voler descominal
16 pert ço del sieu e son amich coral.
17 De ben alt pot hom bax venir
18 e de ben gran, per sa folor,
19 tornar en nien, pus temor
20 ni dubte non ha de perir,
21 per ergull e desconoxensa,
22 per la qual donech Dieus sentensa
23 dels angels mals, que del gaug eternal
24 venguessen jos al foch perpetual.
25 Qui bos cosseyls no·l platz ausir
26 e ço qu’el ditz te per mylor
27 que nuyl bon conseyl de doctor,
28 no·s pes que puscan be fenir
29 sey fait, ans en gran defalensa
30 vindran totz temps e ’n descasensa;
31 savis es donchs qui pren cosseyll lial,
32 laxan lo sieu, pus ve que tan no val.
33 E qui sa volontat complir
34 li platz totz temps, menan folor,
35 e no vol per sa gran ricor
36 honrar cel cuy deu hobezir,
37 com pot aver nuyla cresensa
38 de trobar merçe ni girensa
39 pus que valer cuja tan per engual
40 com le senyors, denegan so feudal?
41 Mas cels qui fal e penedir
42 se·n vol tost e conoix l’error
43 es ha merçe ve del senyor,
44 trobar la deu e cosseguir,
45 car valens senyors gran sufrensa
46 deu aver e gran conoixensa,
47 car tuyt n’avem exemple cominal
48 de perdonar pel Payr’espirital.
49 Reys d’Arago, l’auta semensa
50 reyals don vos etz e d’Entensa
51 merçe totz temps ab cor franch e lial
52 ach, no guardan nuyl fayt descominal.
53 Na Resplandens, Amors vos vensa:
54 faitz me, si us play, dolça parvensa,
55 car si merce del vostre serf lial
56 no us pren, dese pecatz faitz criminal.
Ed. Martín de Riquer, «Thomás Périz de Fozes, trovador aragonés en lengua provenzal», Archivo de filología aragonesa, 3, 1950, pp. 9-18.
Incipitario
di Tomàs Périz de Fozes
Indice
degli autori
