Rialc
Rao 126.2, 156.2, 0.92bis
Bernat de Palaol
e Jaume Rovira
Jachme
1 Senyer Bernatz, dues puncelhas say
2 eguals de pretz, de bondat, de riquesa,
3 ez us donzelhs d’amar l’una se presa,
4 mas elha ges no·l vol ne·l te per gay.
5 L’autra vos dich que l’ama coralmen,
6 don grans servirs le fay se[ne]s mesura
7 ez elh en re d’emar liey no se cura.
8 Diatz me leu de qui·s deu far serven.
Bernatz
9 Responch vos donchs, pus que ve·l temps de may,
10 Jaymes ysnelhs Rovira, ples d’abtesa:
11 l’escuder gay complitz de gentilesa,
12 pus qu’elha·l vol, sembla·m quez ella·l play;
13 tant qu’yeu vos dich mon afar de present:
14 la quez elh platz ges de liey non ha cura
15 ans nueyt e jorn fa d’aquelh sa rencura
16 delan me crits deu estr’obedien.
Jachme
17 Qui los joyelhs d’amor vol haver may
18 fferm e leyals deu [e]star ab gayesa;
19 e si non es, tota res lo menyspresa
20 e pus amor pert lo seu nom veray;
21 perque mi par que·l donzelh fermamen
22 deu mils servir la que vol d’amor pura,
23 e no curant si be·s mostrara dura,
24 car trebalhs grans venç affany veramen.
Bernatz
25 Totz fis aymans de bon cor mantindray
26 en fayts subtil, ses neguna falcesa,
27 per sustenir femna que ’b saviesa
28 vol fin’amor per cert deffensaray;
29 car no deu hom perlar fentamen
30 d’amor leyal ab gent d’auta natura,
31 mas ajudar si, com ditz l’Escriptura:
32 cel qu’es amatz deu amar leyalmen.
Jachme
33 Lo deus d’amor tempta·ls aymans de çay
34 si trobara dins lur cor fortalesa,
35 com Jhesus fech a Joch ab gran empresa;
36 perque·lh donzelh no deu haver [e]smay
37 d’amar sidons pro, sciença perden,
38 la qual mot fort rem tota criatura,
39 e deu haver esper dins sa clausura
40 car Deu no falh als [e]sperans fortmen.
Bernatz
41 Qui vol muntar pus alt que Deus no play
42 no ’s fis aymans ni viu ges ab franquesa,
43 can li defalh lo sen e saviesa;
44 qui munta mays que no deu trop bays cay,
45 si com ha dit Jhesus al mandamen
46 quez amar Dieu qui ama per dreixura
47 e no fazent az altra fortfatxura:
48 pus qu’amatz es deu amar fizelmen.
Jachme
49 Mos jutges proz en aquest pertimen
50 sera, si·l platz, dreg seguin d’amor pura
51 Mossen Germa de Gontaut, on atura
52 granda valors e bontatz eysamen.
Bernatz
53 Mossen Ramon, qu’a bon entendimen,
54 Galbarra, vulh, ses naguna rancura.
55 per la meu part, car a testa madura,
56 que·ns fara dar en breu lo jutgamen.
Sentença donada per los jutges, ço es, los .vii. mantenidors de Tholosa, lo jorn de Sancta Creu de may, ab la qual fon condempnat Bernatz.
1 Nos, jutges per vos elegitz,
2 vostres proces vists e legitz,
3 haut conselh de grans senyors,
4 cavalhiers, burgues e doctors,
5 [e]sperts en la gaya sciença,
6 la qual al fis aymans agença,
7 e sisens en part tribunal
8 ins la mayso comunal
9 on sera nostre jutgamen
10 ffasen dretxura claramen,
11 e·ls sants Avengelis denan,
12 ab nostres mans dretxes senyan,
13 nostres hulhs vesen equitat:
14 dizem qu’aycell anamorat
15 deu amar liey quez aman fort
16 serven de bon cor tro la mort,
17 car lonch temps aman e serven
18 ffara vinclar l’entendimen
19 d’aycelha que no·l vol amar
20 car per servir ez amb preguar
21 Dieus ez auzits lo peccador;
22 donchs, segons l’us de fin’amor
23 no le·n deu ges desemperar,
24 mas tostemps servir ez honrar,
25 car amant contra son voler
26 d’altre no deu haver plaser.
27 E per ço la sentença dam
28 ez en les despeses condempnam
29 En Bernat, car ha mal causit.
30 Axi vos havem diffinit
31 vostre proces al Cocistori,
32 denant les gens [tan] notori.
33 Dades foran al mes de may,
34 lo jorn que l’auzel son gay,
35 en l’any de Deu mil e trecens
36 ladonchs corrien, veramens,
37 affigint hi vuytanta seys,
38 sapjats, ni mas ni menys.
Ed. Martí de Riquer, «Contribución al estudio de los poetas catalanes que concurrieron en las justas de Tolosa», Boletín de la Sociedad Castellonense de Cultura, 26, 1950, pp. 300-308, a p. 305.
Numeriamo come 0.92bis la sentenza dei giudici, che non appare registrata nel Rao.
Incipitario di Bernat de Palaol
Incipitario di Jaume Rovira
Incipitario degli anonimi
Indice degli autori